«Ժառանգության» նախընտրական շտաբը միանում է ընտրություններին մասնակցող «Բարգավաճ Հայաստան», Հայ հեղափոխական դաշնակցություն, Հայաստանի դեմոկրատական, Հայաստանի կոմունիստական, Հանրապետական եւ «Օրինաց երկիր» կուսակցությունների հայտարարությանը, որտեղ մասնավորապես ասվում է. «Կարեւորելով 2012թ. Աժ ընտրությունների անցկացման որակն ու պատշաճ վերահսկողություն իրականացնելու անհրաժեշտությունը եւ հիմք ընդունելով ՀՀ ընտրական օրենսգրքի 6-րդ, 48-րդ եւ 67-րդ հոդվածների դրույթները, որոշեցինք դրսեւորել միասնական կամք, միավորել մեր հնարավորությունները, եւ համատեղ ջանքերով ՀՀ հնարավորինս մեծաքանակ ընտրական տեղամասերում իրականացնել քվեարկության գործընթացի եւ արդյունքների ամփոփման տեսանկարահանում' չխախտելով քվեարկության գաղտնիությունը»:

Երեւան: Մայիսի 1-ին Երեւանի Ազատության հրապարակը լեփլեցուն էր ժպտացող, երգող ու պարող հազարավոր քաղաքացիներով: «Ժառանգություն» կուսակցության հրավերով հայաստանցիների առջեւ ելույթ ունեցան սիրված երգիչներ Հարութ Փամբուկչյանը եւ Ռուբեն Հախվերդյանը: Նրանց կատարմամբ «Սարերի քամի» երգը, որով մեկնարկել էր «Ժառանգության» քարոզարշավը, վերածվեց համաժողովրդական տոնախմբության` համերգ-հաղթահավաքի, որտեղ հնչեցին հիշարժան շատ երգեր` ներկաներին տեղափոխելով իրենց կենսագրության տարբեր տարիներ:

Երեւան: Արարատի մարզի բնակիչներն այսօր հնարավորություն ունեցան  ծանոթանալու «Ժառանգության» նպատակներին եւ Նոր Հայաստանի տեսլականին: Խոր Վիրապում, Սուրենավանում, Արարատում, Վեդիում, Արտաշատում, Վերին Արտաշատում, Այգեզարդում, Բաղրամյանում եւ Մասիսում ընտրողներին հանդիպեցին «Ժառանգության» միասնական ցուցակի ներկայացուցիչներ՝ ԱԺ պատգամավոր Զարուհի Փոստանջյանը, ՀՀ նախկին արտգործնախարար Ալեքսանդր Արզումանյանը, քաղաքագետ, վերլուծաբան Թեւան Պողոսյանը, մանկավարժ, նախկին քաղբանտարկյան Հովհաննես Ղազարյանը, պատմաբան Ստեփան Հասան-Ջալալյանը, Սուսաննա Մուրադյանը եւ այլոք:

Ս.թ. ապրիլի 30-ին թիվ 1 ընտրատարածքում մեծամասնական ընտրակարգով ԱԺ պատգամավորի թեկնածու առաջադրված Ստյոպա Սաֆարյանի նախընտրական շտաբում ահազանգ է ստացվել, որ Ավան թաղամասում խոչընդոտում են թեկնածուի եւ «Ժառանգության» քարոզչական նյութերը բաժանելուն:

«Ժառանգության» նախընտրական շտաբը միանում է ընտրություններին մասնակցող 6 կուսակցությունների նամակին, որով ՀՀ կառավարությանն առընթեր Ազգային անվտանգության ծառայությանն առաջարկվում է մայիսի 6-ից մինչեւ ընտրությունների արդյունքներն անվավեր ճանաչելու մասին ընտրական հանձնաժողով դիմում ներկայացնելու համար սահմանված ժամկետի ավարտը նշված կուսակցությունների մեկական ներկայացուցչի ընձեռել ՍԵԿՏ համակարգից օգտվելու հնարավորություն, որպեսզի անհրաժեշտության դեպքում կարողանան ստուգել իրենց տեղեկություններով քվեարկությանը մասնակցած այս կամ այն քաղաքացու վերաբերյալ համակարգում առկա  տվյալները: